《ᠠᠰᠠᠷᠠᠭᠴᠢ ᠨᠡᠷᠡᠳᠦ ᠶᠢᠨ ᠲᠡᠦᠬᠡ 》ᠬᠡᠮᠡᠬᠦ ᠲᠡᠦᠬᠡᠨ ᠨᠤᠮ ᠢ 1677 ᠤᠨ ᠳᠦ᠂ ᠦᠬᠡᠷ᠎ᠡ ᠪᠡᠷ ᠬᠡᠯᠡᠪᠡᠯ᠂ ᠬᠠᠷ᠎ᠠ ᠬᠤᠷᠤᠮ ᠤᠨ ᠪᠠᠭᠤᠷᠢ ᠲᠡᠭᠡᠷ᠎ᠡ ᠡᠷᠳᠡᠨᠢ ᠶᠢᠨ ᠵᠤᠤ ᠬᠡᠢᠳ ᠢ ᠪᠠᠢᠭᠤᠯᠤᠭᠰᠠᠨ ᠡᠴᠡ ᠬᠤᠢᠰᠢ ᠶᠡᠷᠡᠨ ᠭᠤᠷᠪᠠᠨ ᠤᠨ ᠳᠦ ᠲᠤᠭᠤᠷᠪᠢᠨ ᠪᠢᠴᠢᠵᠠᠢ᠃ ᠮᠠᠨ ᠤ ᠲᠤᠯᠢᠯᠠᠭᠤᠯᠵᠤ ᠪᠦᠬᠦᠢ ᠡᠨᠡ ᠨᠤᠮ ᠪᠤᠯ 1959 ᠤᠨ ᠤ ᠭᠠᠭᠴᠠ ᠡᠬᠡ ᠲᠡᠪᠳᠡᠷ ᠢ ᠤᠤᠯ ᠶᠠᠩᠵᠤ ᠪᠡᠷ ᠨᠢ ᠭᠠᠷ ᠪᠢᠴᠢᠮᠡᠯ ᠤᠨ ᠲᠤᠰᠤᠨ ᠪᠡᠷ ᠢᠶᠡᠷ ᠲᠠᠷᠤᠮᠠᠯᠯᠠᠭᠰᠠᠨ ᠨᠠᠢᠮᠠᠨ ᠵᠦᠰᠦᠮ ᠤᠨ ᠲᠤᠮᠤ ᠲᠡᠪᠳᠡᠷ ᠢ ᠦᠨᠳᠦᠰᠦᠯᠡᠨ ᠬᠢᠨᠡᠵᠦ᠂ ᠤᠳᠤ ᠶᠢᠨ ᠬᠡᠯᠡ ᠲᠡᠭᠡᠷ᠎ᠡ ᠪᠠᠭᠤᠯᠭᠠᠵᠤ᠂ ᠲᠡᠦᠬᠡ ᠶᠢᠨ ᠭᠤᠤᠯ ᠭᠤᠤᠯ ᠬᠦᠮᠦᠰ ᠪᠠ ᠦᠢᠯᠡ ᠬᠡᠷᠡᠭ ᠲᠤ ᠲᠠᠢᠯᠪᠤᠷᠢ ᠬᠢᠵᠦ ᠬᠡᠪᠯᠡᠬᠦᠯᠦᠭᠰᠡᠨ ᠶᠤᠮ᠃ ᠲᠡᠦᠬᠡᠴᠢ ᠵᠠᠮᠪᠠ ᠡᠨᠡ ᠲᠡᠦᠬᠡ ᠪᠠᠨ ᠪᠢᠴᠢᠬᠦ ᠳᠦ ᠪᠠᠨ ᠬᠡᠳᠦᠢᠪᠡᠷ ᠪᠦᠯᠦᠭ ᠠᠩᠬᠢ ᠬᠤᠪᠢᠶᠠᠭᠰᠠᠨ ᠦᠬᠡᠢ ᠪᠤᠯᠪᠠᠴᠤ᠂ ᠲᠡᠬᠦᠨ ᠤ ᠠᠭᠤᠯᠭ᠎ᠠ ᠡᠴᠡ ᠨᠢ ᠪᠦᠳᠦᠴᠡ ᠵᠤᠬᠢᠶᠠᠮᠵᠢ ᠶᠢ ᠲᠤᠳᠤᠷᠬᠠᠢ ᠮᠡᠳᠡᠵᠦ ᠪᠤᠯᠤᠨ᠎ᠠ᠂ ᠡᠨᠡ ᠲᠡᠦᠬᠡ ᠭᠤᠤᠯᠳᠠᠭᠤ ᠡᠬᠢᠯᠡᠬᠦ ᠦᠬᠡ᠂ ᠮᠤᠩᠭᠤᠯ ᠤᠨ ᠡᠷᠳᠡᠨ ᠤ ᠲᠡᠦᠬᠡ᠂ ᠭᠤᠤᠯᠳᠠᠭᠤ ᠴᠢᠩᠬᠢᠰ ᠬᠠᠭᠠᠨ ᠤ ᠲᠡᠦᠬᠡ᠂ ᠲᠤᠬᠤᠨ ᠲᠡᠮᠦᠷ ᠡᠴᠡ ᠠᠷᠪᠠᠨ ᠲᠤᠯᠤᠳᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠬᠦᠷᠳᠡᠯ᠎ᠡ ᠪᠠ ᠲᠡᠭᠦᠰᠭᠡᠯ ᠤᠨ ᠲᠡᠮᠳᠡᠭᠯᠡᠯ ᠵᠡᠷᠭᠡ ᠲᠦᠷᠪᠡᠨ ᠬᠡᠰᠡᠭ ᠢᠶᠡᠷ ᠪᠦᠷᠢᠯᠳᠦᠭᠰᠡᠨ ᠶᠤᠮ᠃