ᠲᠤᠰ ᠡᠮᠬᠢᠳᠭᠡᠯ ᠳᠦ《 ᠪᠣᠳᠢ ᠭᠠᠯᠠᠪ ᠬᠠᠭᠠᠨ 》᠂ 《 ᠪᠠᠭᠠᠲᠤᠷ ᠲᠦᠮᠡᠨ ᠰᠦᠯᠳᠡ 》᠂ 《 ᠪᠦᠬᠡ ᠪᠦᠷᠵᠢᠶᠡᠨ 》 ᠭᠤᠷᠪᠠᠨ ᠲᠤᠤᠯᠢ ᠶᠢ ᠪᠠᠭᠲᠠᠭᠠᠨ ᠣᠷᠣᠭᠣᠯᠣᠭᠰᠠᠨ ᠪᠦᠭᠡᠳ《 ᠪᠣᠳᠢ ᠭᠠᠯᠠᠪ ᠬᠠᠭᠠᠨ 》 ᠬᠢᠭᠡᠳ《 ᠪᠠᠭᠠᠲᠤᠷ ᠲᠦᠮᠡᠨ ᠰᠦᠯᠳᠡ 》 ᠶᠢᠨ ᠴᠣᠭᠤᠷ ᠪᠠ ᠬᠤᠭᠤᠷ ᠢᠶᠠᠷ ᠬᠡᠷᠬᠢᠨ ᠬᠠᠢᠯᠠᠵᠤ ᠪᠠᠢᠭᠰᠠᠨ ᠠᠶᠠᠯᠭᠤ ᠲᠠᠢ ᠨᠢ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠪᠠᠢᠨ᠎ᠠ᠃ 《 ᠪᠤᠳᠢ ᠭᠠᠯᠠᠪ ᠬᠠᠭᠠᠨ 》 ᠬᠡᠮᠡᠬᠦ ᠲᠤᠤᠯᠢ ᠪᠤᠯ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠠᠯᠢ ᠡᠷᠳᠡ ᠦᠶ᠎ᠡ ᠶᠢᠨ ᠠᠬᠤᠢ ᠪᠠᠢᠳᠠᠯ ᠢ ᠲᠤᠰᠬᠠᠭᠰᠠᠨ ᠠᠷᠪᠠᠨ ᠨᠠᠢ᠍ᠮᠠᠳᠤᠭᠠᠷ ᠭᠠᠯᠠᠪ ︵ ᠠᠷᠪᠠᠨ ᠨᠠᠢ᠍ᠮᠠᠨ ᠦᠶ᠎ᠡ ᠶᠢᠨ ᠬᠠᠨ ᠤ ᠦᠯᠢᠭᠡᠷ ᠲᠡᠦᠬᠡ ᠶᠢ ᠬᠠᠷᠠᠭᠤᠯᠤᠭᠰᠠᠨ ︶ ᠬᠡᠮᠡᠬᠦ《 ᠭᠡᠰᠡᠷ ᠬᠠᠨ ᠤ ᠲᠤᠭᠤᠵᠢ 》 ︵ ᠮᠠᠩᠭᠤᠰ ᠤᠨ ᠦᠯᠢᠭᠡᠷ︶ ᠶᠢᠨ ᠡᠬᠢᠨ ᠤ ᠨᠢᠭᠡᠨ ᠰᠠᠯᠠᠭ᠎ᠠ ᠪᠦᠯᠦᠭ ᠪᠤᠯᠬᠤ ᠪᠦᠭᠡᠳ ᠤᠳᠤ ᠪᠤᠯᠳᠠᠯ᠎ᠠ ᠤᠯᠠᠮᠵᠢᠯᠠᠭᠳᠠᠵᠤ ᠪᠠᠢᠭ᠎ᠠ ᠴᠤᠭᠤᠷ ᠢᠶᠡᠷ ᠬᠠᠢᠯᠠᠳᠠᠭ ᠲᠤᠤᠯᠢ ᠪᠤᠯᠬᠤ ᠶᠤᠮ᠃ ᠲᠡᠬᠦᠨ ᠢ ᠬᠠᠢᠯᠠᠬᠤ ᠳᠦ ᠡᠬᠢᠯᠡᠩᠬᠦᠳᠡ ᠭᠠᠯᠠᠪ ᠲᠡᠯᠡᠬᠡᠢ ᠪᠦᠷᠢᠳᠦᠨ ᠲᠤᠭᠳᠠᠬᠤ ᠡᠴᠡ ᠡᠬᠢᠯᠡᠨ ᠬᠠᠢᠯᠠᠳᠠᠭ ᠪᠤᠯᠪᠠᠴᠤ ᠭᠤᠤᠯ ᠨᠢ ᠦᠪᠡᠷ ᠤᠨ ᠠᠢᠮᠠᠭ ᠤᠭᠰᠠᠭ᠎ᠠ ᠳᠦ ᠪᠠᠨ ᠠᠮᠤᠷ ᠵᠢᠮᠤᠷ ᠠᠵᠤ ᠲᠦᠷᠦᠨ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠪᠤᠳᠢ ᠭᠠᠯᠠᠪ ᠬᠠᠭᠠᠨ ᠤ ᠲᠠᠢᠪᠤᠩ ᠠᠮᠢᠳᠤᠷᠠᠯ ᠳᠦ ᠠᠯᠤᠰ ᠬᠤᠯᠠ ᠦᠭᠡᠷ᠎ᠡ ᠲᠢᠪ ᠤᠨ ᠠᠳᠤᠭᠠᠷ ᠮᠠᠩᠭᠤᠰ ᠭᠠᠷ ᠲᠦᠷᠦᠬᠦ ᠡᠴᠡ ᠦᠯᠢᠭᠡᠷ ᠡᠬᠦᠰᠳᠡᠭ᠃ ᠲᠡᠭᠡᠭᠡᠳ ᠪᠤᠳᠢ ᠭᠠᠯᠠᠪ ᠬᠠᠭᠠᠨ ᠨᠢ᠂ ᠦᠪᠡᠷ ᠤᠨ ᠠᠮᠠᠷᠠᠭ ᠬᠠᠳᠤᠨ᠂ ᠠᠩᠭ᠎ᠠ ᠦᠷ᠎ᠡ᠂ ᠠᠢᠮᠠᠭ ᠤᠭᠰᠠᠭ᠎ᠠ ᠶᠢᠨ ᠠᠷᠠᠳ ᠤᠯᠠᠨ ᠤ ᠪᠠᠨ ᠲᠦᠯᠦᠭᠡ᠂ ᠪᠠᠭᠠᠳᠤᠷ ᠰᠦᠷᠳᠡᠨ ᠢᠶᠡᠨ ᠲᠠᠢᠴᠢᠯᠠᠵᠤ᠂ ᠪᠠᠳᠤ ᠬᠤᠶᠠᠭ ᠢᠶᠡᠨ ᠬᠡᠳᠦᠷᠴᠦ᠂ ᠰᠢᠳᠢᠳᠦ ᠵᠡᠪᠰᠡᠭ ᠢᠶᠡᠨ ᠰᠢᠬᠦᠷᠴᠦ᠂ ᠰᠠᠬᠢᠭᠤᠯᠰᠤᠨ ᠬᠦᠯᠦᠭ ᠢᠶᠡᠨ ᠬᠦᠯᠭᠡᠯᠡᠵᠦ᠂ ᠮᠠᠭᠤ ᠮᠠᠭᠤᠬᠠᠢ ᠶᠢᠨ ᠭᠤᠯᠤᠮᠳᠠ ᠪᠤᠯᠤᠭᠰᠠᠨ ᠠᠯᠤᠰ ᠲᠢᠪ ᠤᠨ ᠮᠠᠩᠭᠤᠰ ᠤᠨ ᠤᠷᠤᠨ ᠢ ᠴᠢᠭᠯᠡᠵᠦ᠂ ᠮᠠᠩᠭᠤᠰ ᠤᠨ ᠵᠢᠭᠰᠠᠭᠠᠭᠰᠠᠨ ᠲᠦᠮᠡᠨ ᠪᠡᠷᠬᠡᠳᠦ ᠮᠢᠩᠭᠠᠨ ᠠᠶᠤᠯᠳᠤ ᠵᠢᠭᠰᠠᠭᠠᠯ ᠦᠳ ᠢ ᠮᠢᠳᠠᠷᠠᠰᠢ ᠦᠬᠡᠢ ᠪᠠᠢᠯᠳᠤᠨ ᠲᠤᠭᠤᠯᠵᠤ᠂ ᠮᠠᠩᠭᠤᠰ ᠱᠣᠯᠣᠮ ᠲᠠᠢ ᠦᠬᠦᠵᠦ ᠰᠡᠬᠡᠬᠦ ᠶᠢᠨ ᠰᠢᠷᠦᠭᠦᠨ ᠲᠠᠢᠨ ᠢ ᠬᠢᠵᠦ᠂ ᠬᠤᠷᠮᠤᠰᠳᠠ ᠲᠡᠭᠷᠢ ᠶᠢᠨ ᠲᠡᠮᠵᠢᠯᠭᠡ ᠪᠡᠷ ᠲᠡᠳᠡᠨᠡᠷ ᠢ ᠲᠠᠷᠤᠩᠭᠤᠢᠯᠠᠵᠤ᠂ ᠬᠠᠳᠤᠨ᠂ ᠦᠷ᠎ᠡ᠂ ᠬᠠᠮᠤᠭ ᠤᠯᠠᠨ ᠢᠶᠡᠨ ᠠᠪᠤᠷᠠᠵᠤ᠂ ᠲᠠᠯᠠᠢ ᠶᠡᠬᠡ ᠨᠠᠢᠷ ᠢᠶᠡᠨ ᠲᠡᠯᠭᠡᠵᠦ᠂ ᠲᠠᠯᠠ ᠨᠠᠶᠠᠨ ᠬᠤᠨᠤᠭ ᠢᠶᠡᠷ ᠨᠠᠢᠷᠯᠠᠯᠳᠤᠵᠤ᠂ ᠲᠠᠶᠠᠭᠠᠷ ᠤᠯᠠᠨ ᠢᠶᠡᠷ ᠢᠶᠡᠨ ᠪᠠᠶᠠᠰᠤᠨ ᠵᠢᠷᠭᠠᠵᠤ ᠪᠠᠢᠬᠤ ᠪᠡᠷ ᠲᠡᠭᠦᠰᠳᠡᠭ᠃ 《 ᠪᠠᠭᠠᠲᠤᠷ ᠲᠦᠮᠡᠨ ᠰᠦᠯᠳᠡ 》 ᠭᠡᠳᠡᠭ ᠲᠤᠤᠯᠢ ᠪᠣᠯ ᠵᠤᠤ ᠤᠳᠠ᠂ ᠵᠢᠷᠢᠮ ᠦᠨ ᠠᠭᠤᠯᠠᠷᠬᠠᠭ ᠣᠷᠣᠨ — ᠵᠠᠷᠤᠳ᠂ ᠲᠠᠷᠬᠠᠨ ᠬᠤᠰᠢᠭᠤ᠂ ᠠᠷᠤ ᠬᠣᠷᠴᠢᠨ᠂ ᠪᠠᠭᠠᠷᠢᠨ ᠵᠡᠷᠭᠡ ᠬᠤᠰᠢᠭᠤᠳ ᠢᠶᠠᠷ ᠥᠷᠭᠡᠨ ᠲᠡᠯᠭᠡᠷᠡᠵᠦ ᠤᠳᠠᠭᠠᠨ ᠵᠢᠯ ᠤᠯᠠᠮᠵᠢᠯᠠᠭᠳᠠᠵᠤ ᠢᠷᠡᠭᠰᠡᠨ ᠣᠯᠠᠨ ᠰᠠᠯᠠᠭ᠎ᠠ ᠪᠦᠯᠦᠭᠲᠦ ᠮᠠᠩᠭᠤᠰ ᠤᠨ ᠦᠯᠢᠭᠡᠷ ᠪᠤᠶᠤ ᠭᠡᠰᠡᠷ ᠦᠨ ᠲᠤᠭᠤᠵᠢ ᠶᠢᠨ ᠨᠢᠭᠡᠨ ᠵᠢᠵᠢᠭ ᠰᠠᠯᠠᠭ᠎ᠠ ᠲᠤᠤᠯᠢ ᠪᠣᠯᠣᠨ᠎ᠠ᠃ 《 ᠪᠦᠬᠡ ᠪᠦᠷᠵᠢᠶᠡᠨ 》ᠭᠡᠳᠡᠭ ᠲᠤᠤᠯᠢ ᠪᠣᠯ ᠠᠷᠪᠠᠨ ᠳᠣᠯᠤᠳᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠳᠦ ᠠᠪᠤᠷᠭᠤ ᠶᠡᠬᠡ ᠬᠠᠲᠤᠨ ᠭᠣᠣᠯ ᠤᠨ ᠪᠣᠷᠤᠲᠤᠬᠠᠢ᠂ ᠠᠯᠤᠰ ᠲᠤ ᠨᠡᠷ᠎ᠡ ᠲᠠᠢ ᠮᠤᠨᠢ ᠬᠠᠢᠷᠬᠠᠨ ᠤ ᠲᠣᠭᠤᠷᠢᠨ ᠳᠤ ᠨᠤᠲᠤᠭᠰᠢᠨ ᠠᠮᠢᠳᠤᠷᠠᠭᠰᠠᠨ ᠤᠷᠠᠳᠴᠤᠳ ᠤᠨ ᠲᠣᠲᠤᠷ᠎ᠠ ᠴᠣᠯᠭᠤᠷᠠᠨ ᠭᠠᠷᠤᠭᠰᠠᠨ ᠦᠷᠡᠵᠢᠶᠡᠨ ᠭᠡᠳᠡᠭ ᠲᠡᠦᠬᠡᠨ ᠠᠯᠳᠠᠷᠲᠤ ᠪᠦᠬᠡ ᠪᠠᠨ ᠮᠦᠷᠦᠭᠡᠳᠦᠨ ᠰᠠᠨᠠᠭᠠᠯᠵᠠᠵᠤ ᠠᠷᠠᠳ ᠤᠨ ᠳᠤᠮᠳᠠ ᠤᠯᠠᠮᠵᠢᠯᠠᠭᠳᠠᠵᠤ ᠢᠷᠡᠭᠰᠡᠨ ᠦᠯᠢᠭᠡᠷ ᠢ ᠡᠮᠬᠢᠳᠭᠡᠭᠰᠡᠨ ᠨᠡᠯᠢᠶᠡᠳ ᠲᠡᠯᠭᠡᠷᠡᠩᠭᠦᠢ ᠠᠭᠤᠯᠭ᠎ᠠ ᠲᠠᠢ ᠲᠤᠤᠯᠢ ᠪᠣᠯᠣᠨ᠎ᠠ᠃