《ᠭᠠᠩᠭ᠎ᠠ ᠶ᠋ᠢᠨ ᠤᠷᠤᠰᠭᠠᠯ》ᠪᠣᠯ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠦ᠌ ᠣᠨ ᠳᠠᠷᠠᠭᠠᠯᠠᠭᠰᠠᠨ ᠲᠡᠦᠬᠡᠨ ᠵᠣᠬᠢᠶᠠᠯ ᠪᠣᠯᠤᠨ᠎ᠠ᠃ ᠲᠤᠰ ᠵᠣᠬᠢᠶᠠᠯ ᠢ᠋ ᠡᠷᠳᠡᠮᠲᠡᠨ ᠭᠤᠮᠪᠤᠵᠠᠪ ᠵᠣᠬᠢᠶᠠᠪᠠ᠃ ᠭᠤᠮᠪᠤᠵᠠᠪ ᠪᠣᠯ ᠠᠷᠪᠠᠨ ᠨᠠᠢ᠍ᠮᠠᠳᠤᠭᠠᠷ ᠵᠠᠭᠤᠨ ᠤ᠋ ᠦᠶ᠎ᠡ ᠳ᠋ᠤ᠌ ᠭᠣᠪᠢ ᠶ᠋ᠢᠨ ᠡᠮᠦᠨᠡᠬᠢ ᠮᠣᠩᠭᠤᠯ ᠣᠷᠤᠨ ᠳ᠋ᠤ᠌ ᠴᠣᠯᠭᠤᠷᠠᠨ ᠭᠠᠷᠤᠭᠰᠠᠨ ᠠᠯᠳᠠᠷᠲᠦ ᠲᠡᠦᠬᠡᠴᠢ᠂ ᠣᠷᠴᠢᠭᠤᠯᠤᠭᠴᠢ ᠪᠠ ᠬᠡᠯᠡᠨ ᠤ᠋ ᠡᠷᠳᠡᠮᠲᠡᠨ ᠮᠥᠨ᠃ ᠲᠡᠷᠡ ᠨᠠᠢᠷᠠᠯᠲᠦ ᠲᠥᠪ ᠦ᠋ᠨ ᠭᠤᠷᠪᠠᠳᠤᠭᠠᠷ ᠣᠨ (1725)  ᠳ᠋ᠤ᠌ ᠲᠥᠷᠦᠯᠬᠢ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠮᠣᠩᠭᠤᠯ ᠤ᠋ᠨ ᠡᠵᠡᠨ ᠬᠠᠳ ᠪᠠ ᠨᠣᠶᠠᠳ ᠤ᠋ᠨ ᠭᠣᠣᠯ ᠤᠭᠰᠠᠭᠠᠨ ᠤ᠋ ᠤᠯᠠᠮᠵᠢᠯᠠᠯ ᠢ᠋ ᠣᠨ ᠳᠠᠷᠠᠭᠠᠯᠠᠨ ᠪᠢᠴᠢᠭᠰᠡᠨ ᠲᠡᠦᠬᠡᠨ ᠵᠣᠬᠢᠶᠠᠯ 《ᠭᠠᠩᠭ᠎ᠠ ᠶ᠋ᠢᠨ ᠤᠷᠤᠰᠭᠠᠯ》 ᠢ᠋ ᠵᠣᠬᠢᠶᠠᠪᠠ᠃ ᠲᠤᠰ ᠵᠣᠬᠢᠶᠠᠯ ᠨᠢ《ᠠᠩᠬᠠᠨ ᠤ᠋ ᠪᠦᠯᠦᠭ》 《ᠨᠥᠭᠥᠭᠡ ᠪᠦᠯᠦᠭ》 ᠭᠡᠵᠦ ᠬᠣᠶᠠᠷ ᠪᠦᠯᠦᠭ ᠲᠤ᠌ ᠬᠤᠪᠢᠶᠠᠭᠳᠠᠵᠠᠢ᠃《ᠠᠩᠬᠠᠨ ᠤ᠋ ᠪᠦᠯᠦᠭ》 ᠲᠤ᠌《ᠬᠢᠶᠤᠳ ᠶᠠᠰᠤᠲᠠᠨ ᠤ᠋ ᠠᠯᠲᠠᠨ ᠤᠷᠤᠭ ᠤ᠋ᠨ ᠤᠭ ᠦᠨᠳᠦᠰᠦᠨ》ᠴᠢᠩᠭᠢᠰ ᠬᠠᠭᠠᠨ ᠲᠡᠭᠦᠨᠴᠢᠯᠡᠨ ᠬᠣᠢᠰᠢᠬᠢ ᠤ᠋ᠨ ᠡᠯ᠎ᠡ ᠬᠠᠳ ᠤ᠋ᠨ ᠵᠠᠯᠭᠠᠮᠵᠢᠯᠠᠯ ᠪᠠ ᠴᠢᠩᠭᠢᠰ ᠬᠠᠭᠠᠨ ᠤ᠋《 ᠠᠯᠲᠠᠨ ᠤᠷᠤᠭ》 ᠡᠴᠡ ᠰᠢᠭᠤᠳ ᠡᠭᠦᠰᠦᠭᠰᠡᠨ ᠠᠢᠮᠠᠭ ᠤ᠋ᠨ ᠨᠣᠶᠠᠳ ᠤ᠋ᠨ ᠵᠠᠯᠭᠠᠮᠵᠢᠯᠠᠯ ᠢ᠋ ᠪᠢᠴᠢᠵᠡᠢ᠃《 ᠨᠥᠭᠥᠭᠡ ᠪᠦᠯᠦᠭ》 ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠭᠦᠦᠨᠠᠷ ᠪᠣᠯᠤᠨ ᠲᠡᠳᠡᠨ ᠤ᠋ ᠦᠷ᠎ᠡ ᠠᠴᠢᠨᠠᠷ ᠤ᠋ᠨ ᠬᠠᠷᠢᠶ᠎ᠠ ᠠᠢᠮᠠᠭ ᠤ᠋ᠨ ᠨᠣᠶᠠᠳ ᠤ᠋ᠨ ᠵᠠᠯᠭᠠᠮᠵᠢᠯᠠᠯ᠂ ᠮᠣᠩᠭᠤᠯ ᠤ᠋ᠨ ᠲᠡᠦᠬᠡᠨ ᠳ᠋ᠡᠬᠢ ᠨᠡᠷᠡᠲᠦ ᠰᠠᠢᠳ ᠪᠠ ᠮᠣᠩᠭᠤᠯ ᠤ᠋ᠨ ᠨᠡᠢᠭᠡᠮ ᠤ᠋ᠨ ᠵᠠᠰᠠᠭ ᠵᠠᠬᠢᠷᠭᠠᠨ ᠤ᠋ ᠪᠠᠢᠭᠤᠯᠤᠮᠵᠢ᠂ ᠶᠡᠷᠦᠩᠬᠡᠢ ᠪᠠᠢᠳᠠᠯ ᠵᠡᠷᠭᠡ ᠶ᠋ᠢ ᠥᠭᠦᠯᠡᠨ ᠲᠤᠰᠢᠶᠠᠵᠠᠢ᠃ ᠤᠤᠯ ᠤ᠋ᠨ ᠵᠥᠪᠯᠡᠯᠲᠦ ᠬᠣᠯᠪᠤᠭᠠᠲᠦ ᠤᠯᠤᠰ ᠤ᠋ᠨ ᠮᠣᠩᠭᠤᠯᠴᠢ ᠡᠷᠳᠡᠮᠲᠡᠨ ᠯ • ᠰ •ᠫᠦᠴᠺᠦᠸᠰᠺᠢ ᠂1909 -1910ᠣᠨ ᠤ᠋ ᠦᠶ᠎ᠡ ᠪᠡᠷ ᠠᠪᠠᠭ᠎ᠠ ᠬᠣᠰᠢᠭᠤᠨ ᠡᠴᠡ ᠣᠯᠳᠠᠭᠰᠠᠨ ᠨᠢᠭᠡᠨ ᠢᠵᠢ《 ᠭᠠᠩᠭ᠎ᠠ  ᠶ᠋ᠢᠨ ᠤᠷᠤᠰᠭᠠᠯ》 ᠤ᠋ᠨ ᠬᠠᠭᠤᠯᠤᠮᠠᠯ ᠰᠤᠳᠤᠷ ᠢ᠋ 1960 ᠣᠨ ᠳ᠋ᠤ᠌ ᠭᠡᠷᠡᠯ ᠵᠢᠷᠤᠭ  ᠢ᠋ᠶ᠋ᠡᠷ ᠪᠠᠭᠤᠯᠭᠠᠨ ᠲᠣᠪᠴᠢ ᠤᠳᠤᠷᠢᠳᠭᠠᠯ ᠪᠢᠴᠢᠭᠡᠳ ᠮᠤᠰᠺᠸᠠ ᠳ᠋ᠤ᠌ ᠬᠡᠪᠯᠡᠭᠦᠯᠵᠡᠢ᠃ 1980ᠣᠨ ᠳ᠋ᠤ᠌᠂ ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠨᠡᠢᠭᠡᠮ ᠤ᠋ᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠬᠦᠷᠢᠶᠡᠯᠡᠩ ᠤ᠋ᠨ ᠮᠣᠩᠭᠤᠯ ᠲᠡᠦᠬᠡᠴᠢ ᠴᠥᠢᠵᠢ ᠳᠡᠭᠡᠷ᠎ᠡ ᠳᠤᠷᠠᠳᠤᠭᠰᠠᠨ ᠬᠡᠪᠯᠡᠯ ᠢ᠋ ᠳᠠᠬᠢᠨᠲᠠ ᠲᠤᠯᠭᠠᠨ ᠬᠠᠷᠢᠴᠠᠭᠤᠯᠵᠤ᠂ ᠲᠠᠢᠯᠪᠤᠷᠢ ᠬᠠᠳᠠᠭᠠᠳ ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠤ᠋ᠨ ᠬᠣᠷᠢᠶ᠎ᠠ ᠳ᠋ᠤ᠌ ᠬᠡᠪᠯᠡᠭᠦᠯᠪᠡ᠃ ᠣᠳᠣ ᠬᠡᠪᠯᠡᠭᠦᠯᠵᠦ ᠪᠠᠢᠭ᠎ᠠ ᠨᠢ ᠴᠣᠢᠵᠢ ᠶ᠋ᠢᠨ1980 ᠣᠨ ᠤ᠋ ᠬᠡᠪᠯᠡᠯ  ᠢ᠋ ᠪᠦᠬᠦ ᠠᠭᠤᠯᠭ᠎ᠠ ᠪᠡᠷ ᠨᠢ ᠣᠷᠤᠭᠤᠯᠤᠭᠰᠠᠨ ᠪᠡᠷ ᠪᠠᠷᠠᠬᠤ ᠦᠭᠡᠢ᠂ ᠪᠠᠰᠠ ᠤᠯᠠᠭᠠᠨᠬᠠᠳᠠ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠯᠸᠺᠲ᠋ᠤᠷ ᠹᠸᠩ ᠰᠢᠶᠣᠣ ᠶ᠋ᠢᠨ ᠥᠭᠦᠯᠡᠯ ᠡᠴᠡ《 ᠭᠠᠩᠭ᠎ᠠ ᠶ᠋ᠢᠨ ᠤᠷᠤᠰᠭᠠᠯ》ᠢ᠋ ᠬᠢᠲᠠᠳᠴᠢᠯᠠᠵᠤ ᠲᠠᠢᠯᠪᠤᠷᠢᠯᠠᠭᠰᠠᠨ ᠪᠠ ᠯᠠᠲ᠋ᠢᠨ ᠢ᠋ᠶ᠋ᠡᠷ ᠠᠪᠢᠶᠠᠯᠠᠭᠰᠠᠨ ᠬᠡᠰᠡᠭ ᠢ᠋ ᠲᠡᠷᠡ ᠬᠡᠪ ᠢ᠋ᠶ᠋ᠡᠷ ᠨᠢ ᠣᠷᠤᠭᠤᠯᠵᠤ᠂ ᠭᠠᠷ ᠬᠠᠭᠤᠯᠤᠮᠠᠯ ᠳᠡᠪᠲᠡᠷ ᠤ᠋ᠨ ᠭᠡᠷᠡᠯ ᠵᠢᠷᠤᠭ ᠢ᠋  ᠴᠦ᠍ ᠪᠦᠬᠦᠨ ᠢ᠋ ᠣᠷᠤᠭᠤᠯᠪᠠ᠃ ᠲᠤᠰ ᠨᠣᠮ ᠢ᠋ ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠴᠦ᠋ᠬᠡᠨ ᠲᠣᠭᠠᠲᠦ ᠦᠨᠳᠦᠰᠦᠲᠡᠨ ᠤ᠋ ᠰᠤᠳᠤᠷ ᠪᠢᠴᠢᠭ ᠪᠣᠯᠤᠨ《 ᠭᠡᠰᠡᠷ》 ᠢ᠋ ᠡᠮᠬᠢᠳᠭᠡᠨ ᠰᠤᠳᠤᠯᠬᠤ ᠭᠠᠵᠠᠷ᠂ ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠰᠢᠯᠢ ᠶ᠋ᠢᠨ ᠭᠣᠣᠯ ᠠᠢᠮᠠᠭ ᠤ᠋ᠨ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠣᠰᠢᠭᠤ᠂ ᠵᠠᠭᠦᠨ ᠦᠵᠦᠮᠦᠴᠢᠨ ᠬᠣᠰᠢᠭᠤ ᠬᠠᠮᠳᠤᠷᠠᠨ ᠬᠡᠪᠯᠡᠭᠦᠯᠵᠦ᠂ ᠡᠨᠡ ᠨᠢ《 ᠮᠣᠩᠭᠤᠯ ᠲᠤᠯᠭᠤᠷ ᠪᠢᠴᠢᠭ ᠤ᠋ᠨ ᠴᠤᠪᠤᠷᠠᠯ》  ᠤ᠋ᠨ《ᠭᠣᠮᠪᠤᠵᠠᠪ ᠭᠦᠩ ᠤ᠋ᠨ ᠵᠣᠬᠢᠶᠠᠩᠭᠤᠢ》 ᠶ᠋ᠢᠨ ᠠᠩᠬᠠᠨ ᠤ᠋ ᠪᠣᠳᠢ ᠪᠣᠯᠤᠨ᠎ᠠ᠃